Siglir tar il cuntegn

Header

video
Emprest senza tschains per IKRK
Or da News-Clip dals 30.04.2020.
laschar ir
cuntegn

Per cumbatter il coronavirus 400 milliuns francs per acziuns internaziunalas

La pandemia da corona tutga cunzunt ferm pajais en svilup. Per mitigiar las consequenzas, vul il Cussegl federal impunder supplementarmain 400 milliuns francs.

Al Comité internaziunal da la Crusch Cotschna vul il Cussegl federal conceder in emprest senza tschains da totalmain 200 milliuns francs, ha communitgà il minister da l'exteriur Ignazio Cassis. 25 milliuns francs duajan ir ad in fonds da catastrofa dal Fond monetar internaziunal IWF. Il parlament duaja approvar omadus credits en la sessiun da stad.

video
Parlament decida davart credits en sessiun da stad
Or da News-Clip dals 30.04.2020.
laschar ir

Cun 175 milliuns vul il Cussegl federal sustegnair organisaziuns internaziunalas e la collavuraziun internaziunala en il cumbat cunter la pandemia. Il Cussegl federal decida il matg en chaussa. La cumissiun per la politica exteriura dal Cussegl grond pretenda en ina moziun d'augmentar l'agid umanitar per 100 milliuns francs.

Undas da fugitivs

Cun quest engaschi vul il Cussegl federal er impedir in'ulteriur'unda da fugitivs. Sch'ils pli paupers dal mund na possian betg pli lavurar, na possian els betg pli sustegnair lur famiglias. Il risico da revoltas socialas s'augmentass e dapli persunas fissan sfurzadas da bandunar lur patria. Perquai saja en l'interess da la Svizra da far frunt a las raschuns da fugia.

En il rom da la cooperaziun al svilup haja la Svizra reagì spert ed effectiv sin la crisa, scriva il Cussegl federal. Cun adattar programs actuals haja la Svizra pudì metter a disposiziun passa 100 milliuns francs ord ils budgets existents per cumbatter la pandemia.

Uschia vegnia la lavur d'organisaziuns da las Naziuns Unidas e dal Comité Internaziunal da la Crusch Cotschna ed auters projects impurtants da la cooperaziun al svilup svizra rinforzada, scriva il Cussegl federal. L'agid umanitar da la Direcziun da svilup e da cooperaziun Deza haja gia furnì rauba d'agid sin dumonda da pajais pertutgads.

RTR novitads 09:00

Artitgels legids il pli savens

Ir a sanester Ir a dretg