Siglir tar il cuntegn
Banderola cun il slogan da l'iniziativa per il futur che penda dad ina punt.
Legenda: MAD

Per il clima Giuvens socialists lantschan «iniziativa per il futur»

In'autra politica da clima, quai pretendan ils Giuvens socialists ensemen cun exponents da la Partida socialdemocratica e dals Verds. Perquai han els lantschà lur «iniziativa per il futur». Quella duai gidar a finanziar la transfurmaziun ecologica e sociala da l'entira economia svizra.

Il punct central da l'iniziativa è ina taglia da 50% sin iertas e donaziuns che surpassan 50 milliuns francs. Cun ils daners che vegnissan viaden – ils iniziants quintan cun da quai da sis milliardas francs mintg'onn – duain vegnir instradadas mesiras en il sectur da lavur, d'abitar ed era dals servetschs publics. Per exempel sustegnair la midada davent da pignas fossilas vi tar stgaudaments ecologics u meglierar la purschida dal traffic public e render quel accessibel per l'entira populaziun.

Critica da vart burgaisa

Strusch lantschada datti dentant era gia critica. Tenor ils Giuvens liberals è l'iniziativa in'ulteriura attatga sin las interpresas da famiglia e chastia quellas persunas che prestian bler per l'economia e la societad svizra.

Enfin il favrer dal 2024 han ils iniziants ussa temp da rimnar las 100'000 suttascripziuns necessarias.

RTR novitads 12:00

Artitgels legids il pli savens