Ils daners ch'il Cussegl federal preveda per gidar durant l'enviern duain cunzunt vegnir duvrads per mantegnair l'infrastructura da l'aua da baiver e dal provediment d'energia. Passa 30% da l'infrastructura d'energia en l'Ucraina è donnegiada ed en blers lieus è il provediment interrut pervi dad attatgas specificas da la Russia.
Il nov pachet d'agid duai cumplettar l'engaschi umanitar da la Svizra che gira gia. Perquai ha il Cussegl federal dumandà il parlament per ulteriurs 76 milliuns francs uschia ch'i sa resulta tut en tut ils 100 milliuns numnads.
Generaturs, fanestras e tocca
La Svizra porscha tranter auter tocca da remplazzament per infrastructura d'energia, sistems da transport per urden pesant u er fanestras u isolaziun per reparar chasadas. Actualmain vegn er guardà sch'igl è pussaivel da furnir generaturs, pumpas u implants per schubregiar aua.
Tenor il Cussegl federal èn radund 18 milliuns persunas u 40% da la populaziun ucranaisa avisada sin agid. Cun l'enviern pudessia quest dumber crescher sin 24 milliuns persunas.
