En l'emprima enquista da Tamedia han ils adversaris da l'iniziativa d'autodeterminaziun davant il nas. Radund 50% schessan Na e radund 3% schessan plitost Na. Quels che schessan Gea èn tar 41% e las vuschs che schessan plitost Gea fan ora 4%. 2% dals dumandads n'hajan fatg nagina indicaziun.
La cumpart dals umens che schessan Gea a l'iniziativa è tar 43%, be 37% da las dunnas approvassan l'iniziativa da la PPS. Cunter l'iniziativa votassan il mument 49% dals umens e 50% da las dunnas. Tenor regiuns linguisticas schessan 52% da la Svizra taliana Gea a l'iniziativa. En la Svizra franzosa èn quai be 37% ed en Svizra tudestga 41%.
Il pli impurtant argument cunter l'iniziativa (46%) è stà che la Svizra decidia gia oz sezza tge contracts internaziunals ch'ella fetschia. Plinavant stuessan contracts vegnir desditgs ch'èn vinavant d'impurtanza per la Svizra.
Pli vegls èn per iniziativa da vatgas cun corna
L'iniziativa per vatgas cun corna è sin buna via. Il mument schessan 36% Gea e 17% plitost gea. L'argument principal (52%) è che da far giu corna saja maltractà ils animals. Na din il mument 29% e plitost Na 10%. Nagina indicaziun han fatg 8% dals dumandads.
Cun la vegliadetgna crescha la cumpart d'aderents per l'iniziativa. Be 21% da las persunas tranter 18 e 24 onns di Gea, tar las persunas sur 65 onns è quai passa il dubel, cun 46%. En las regiuns linguisticas na datti strusch differenzas.
Lescha per survegliar assicurads socials ha blers aderents
La cumpart dals aderents per la lescha è il mument tar 54%. Plitost Gea schessan 13%. L'argument principal qua è che la lescha sustegna il cumbat cunter l'abus a moda effectiva e quai a favur dals assicurads sincers, scriva la Tamedia.
Las vuschs cunter la lescha fan ora be 22% e plitost Na schessan 8%. Ils adversaris da la lescha èn da l'avis che quella cuntrafa a la sfera privata e saja in privel per il stadi da dretg (48%) Anc indecis èn 3%.
RR novitads 06:00