Siglir tar il cuntegn

Header

cuntegn

Per interpresas da l'exteriur Blers regals da taglia n'avessan gnanc fatg basegn

Firmas ch’èn vegnidas en Svizra e ch’han profità da levgiaments da taglia, han per gronda part creà plazzas da lavur persistentas. Quai resulta d'in rapport da la Controlla federala da finanzas ch'ha prendì sut la marella ils levgiaments da taglia dals ultims 20 onns.

Las plazzas sajan er restadas, cura che las firmas han stuì pajar la taglia cumplaina. Bleras firmas fissan però er vegnidas senza levgiaments. Dus terzs da las plazzas da lavur fissan pia en mintga cas vegnidas stgaffidas – scriva la Controlla federala da finanzas.

Entant profiteschan surtut firmas svizras

Per carmalar interpresas da l'exteriur en Svizra, survegnan mintg'onn tranter 30 e 90 firmas tals levgiaments da taglia. Pervi da quels levgiaments èn idas a perder tenor il rapport radund 12 milliardas entradas da taglia a la Confederaziun durant il 2007 fin 2016.

Il rapport mussa dentant er che l'instrument per carmalar interpresas da l'exteriur en Svizra è vegnì duvrà pli pauc savens ils ultims 10 onns. Vitiers vegn ch'il focus da l'instrument è sa midà: Actualmain profiteschan surtut interpresas svizras dals levgiaments da taglia. I va uss numnadamain per mantegnair plazzas da lavur en regiuns perifericas.

RTR novitads 09:00

Artitgels legids il pli savens

Scrollar a sanestra Scrollar a dretga