«Per la segirezza alimentara» - gea piz a cup

Igl è stà ina pitschna surpraisa en il Cussegl naziunal. Piz a cup - cun 91:83 vuschs - sustegna la Chombra gronda l'iniziativa che vul dapli protecziun per products agriculs svizers.

Vatgas sin in alp. Bild in Lightbox öffnen.

Legenda da maletgs: Gea a l’iniziativa "per la segirezza alimentara" - Il Cussegl naziunal sustegn l'iniziativa da l'uniun purila 91:83 vuschs. Keystone

Il Cussegl naziunal sa metta uschia cunter la proposta da sia cumissiun e dal Cussegl federal. La pitschna maioritad è reussida grazia a las vuschs da la PCD, la BDP ed ina maioritad da la PPS. Ils Verds èn s'abstegnids.

Pro e contra tar l'iniziativa

Il aderent da l'iniziativa di ...

... ch'il terren svizzer è custaivel. Perquai stoppia quel vegnir protegids meglier, uschia il Cusseglier naziunal burgais-democrat Duri Campell. E gist quai vegli l'iniziativa dal pievel da l'uniun purila svizra cun il num "Per la segirezza alimentara".

Ina tala protecziun dettia per exempel gia ussa tar il guaud. La lescha da guaud pretenda da plantar da nov guad, sch’ins prenda davent el. In mecanissem sumegliant pudess Campell era s’imaginar per il terren agricul.

Quai è dentant mo in aspect da l'iniziativa. Tenor quella duai la Confederaziun mirar che la populaziun vegni alimentada cun victualias ord producziun indigena. Plinavant duai il Cussegl federal prender mesiras per cumbatter la perdita da terren agricul, lantschar ina strategia da qualitad e reducir la birocrazia.

La politica agrara per ils onns 2014 - 2017 haja mess l'accent sin l'ecologia ed il bainstar dals animals. Da quai profiteschia cunzunt l'agricultura en las muntognas, conceda Campell.

Duri Campell en portrait. Avrir maletg en lightbox.

Legenda da maletgs: Keystone

«  Il è impurtant dad adina puspè resguardar l’agricultura da muntogna e l’agricultura da la Bassa. »

Duri Campell
Cusseglier naziunal (PBD/GR)

L'adversaria admonischa ...

... che quai saja dentant gist il cuntrari da quai ch'ins haja vulì cuntanscher cun la nova politica agrara. La socialdemocrata Silva Semadeni: “Dapli producziun signifitga dapli producziun intensiva, dapli pesticids e dapli antibiotica. Propi quai che las consumentas ed ils consuments na veglian betg.”

Ultra da quai saja l'iniziativa insumma betg necessaria. Ils puncts che quella vegli cuntanscher sajan gia oz da chattar ella constituziun ed en las leschas:

silva Semadeni en il Cussegl naziunal. Avrir maletg en lightbox.

Legenda da maletgs: Keystone

«  Avant dus u trais onns avain nus fatg ina revisiun da la lescha per la planisaziun dal territori. Ussa ston ils chantuns realisar quai ch’è en la lescha. »

Silva Semadeni
Cussegliera naziunala (PS/GR)

Uss fiss il mument da s’engaschar per quai e betg da far novs artitgels constituziunals che na pon midar nagut vid ina situaziun gia clera, di Semadeni.

Resistenza vegn era da l'economia

Sper la sanestra e las uniuns per la protecziun da la natira fa era l'economia opposiziun - numnadamain las uniuns da commerzi, economieSuisse, Hotellerie- e GastroSuisse, sco era ils proprietaris da chasas.

Hans-Ulrich Bigler, il directur da l'Uniun svizra d'artisanadi e mastergn, vesa en l'iniziativa in'emprova da restrenscher la fiera libra. Uschè spert ch’insatgi vegli la protecziun statala dad ina fiera lura saja el alarmà. I sa tschentia bainprest la dumanda sch’ins vegli s’isolar da la concurrenza. Ils custs da quella politica purtassan las interpresas e la fin finala ils consuments, avertescha Bigler.

Quitads per ils consuments svizers da la vart da la PPS

Mo i na sappia era betg esser en l'interess dals consuments che adina dapli victualias vegnan importadas da l’exteriur, respunda Albert Rösti da la PPS. “I va per mesiras per la protecziun dals animals e per mesiras ecologicas ch’èn en Svizra pli strictas. E quai custa la fin finala era in zic dapli.”

Retschertgas hajan mussà che la populaziun svizra spetgi dals purs svizzers ch’els produceschian a moda ecologica e ch’els cultiveschian ina gronda varietad da products.

Senza protecziun per l’agricultura Svizra stoppia quella a lunga vista chalar da producir. E quai na possia betg esser en l’interess public. I dovria perquai ina segirezza alimentara minimala, di Rösti.

Sco adina tar temas da l'agricultura èsi da spetgar ina debatta animada en il Cussegl naziunal oz. Ed i savess ir piz a cup. Damai las opiniuns en las fracziuns èn dividì èsi grev da dir sin tge vart che la decisiun croda. Malgrà quai, in gie da la Chombra gronda a l'iniziativa dal pievel per la segirezza alimentara fiss ina pitschna surpraisa.

RR novitads 18:00