Cunquai nascha il segund grond purschider da telecommunicaziun da l'Italia suenter il leader da la branscha TIM. La fatschenta n'è però anc betg suttascritta ed actualmain saja er anc avert sch'i vegn ad ina transacziun. Las tractativas sajan però avanzadas lunsch, hai num vinavant en ina communicaziun. Funtaunas bain infurmadas quintan che la surpigliada è anc planisada per quest onn.
Svieuta da radund set milliardas euros
L'idea da la Swisscom e da metter ensemen Vodafone Italia cun la filiala taliana da bindel ultra lad Fastweb ch'è gia en possess da la Swisscom. Questa interpresa communabla vegn ad avair ina svieuta da set milliardas euros e passa 8000 collavuraturas e collavuraturs. Sco Swisscom scriva sa cumpletteschian las duas firmas bain, ina saja ferma en la rait mobile e l'autra en la rait fixa. Plinavant haja la supigliada effects positivs sin dividendas ed il cashflow da Swisscom.
