Siglir tar il cuntegn
cuntegn

Svizra Per part il pli chaud october da l'istorgia

Malgrà la fin dal mais burascusa e fitg bletscha: Sur tut ora è l'october 2018 stà extremamain chaud. En spezial en il sid dal pajais èsi per part stà uschè chaud sco anc mai dapi il cumenzament da las mesiraziuns il 1864.

panorama da Riein envers il Piz Mundaun, tschiel blau e pastg verd
Legenda: In october magnific, qua en Surselva, da Riein en vista al Piz Mundaun. RTR, Hugo Schär

Dasper ils dis extraordinariamain chauds cun 30,5 grads a Locarno, hai era dà trais dis da stad a Cuira. Sco quai che SRF Meteo communitgescha eran las temperaturas a Locarno e Lugano per 3,5° sur la norma. En il nord da las Alps èsi stà dus grads pli chaud che la media, en la Svizra orientala schizunt 2,5°.

Quasi records dals dis da sulegl

En il nord e l'ost dal pajais era la durada da sulegl datiers dals records absoluts. En la Bassa ha il sulegl glischà 60% pli ditg che la media durant in october. En muntogna hai dà passa 200 uras da sulegl, uschia per exempel sin il Moléson, il Gornergrat u il Säntis.

Malgrà ch'i ha pluvì ferm la fin dal mais hai dà en la Svizra franzosa sulet 20 fin 30% da la plievgia usitada l'october. A Savognin perencunter hai pluvi 330% dapli che normal.

RR novitads 18:00