Siglir tar il cuntegn

Header

cuntegn

Per persunas betg vaccinadas Confederaziun vul obligatori da testar tar persunal da sanadad

L’Uffizi federal da sanadad ha fatg pliras propostas co far frunt a la derasaziun dal coronavirus. Plinavant na vul la Confederaziun naginas ulteriuras schluccadas. Per quai mussan ils chantuns chapientscha.

L’Uffizi federal da sanadad ha fatg pliras propostas co far frunt a la derasaziun dal coronavirus. Tgi che lavura en il sectur da sanadad e n’è betg vaccinà duai en il futur vegnir obligà da sa laschar testar sin il coronavirus, propona la Confederaziun als chantuns. Er las campagnas da vaccinaziun duain vegnir intensivadas.

Plinavant vul la Confederaziun ch’ils chantuns prendan en las proximas emnas mesiras per proteger meglier uffants, giuvenils e persunas periclitadas. Uschia duain per exempel visitas en ospitals, chasas da tgira ed attempads mo pli esser pussiblas cun in certificat.

Mesiras actualas duain restar

Bain ch'il dumber da persunas infectadas crescha il davos temp: Mesiras pli strictas na prevesa la Confederaziun actualmain betg. Ulteriuras schluccadas na sajan dentant er betg en vista. Surtut pervia da la varianta delta – ina varianta dal virus ch'è pli contagiusa – stoppian ins tegnair bain en egl las cifras d'infecziun.

Naginas schluccadas: chantuns mussan chapientscha

Ils chantuns mussan chapientscha per la decisiun da betg schluccar las mesiras da corona per il mument. Quai ha ditg Lukas Engelberger, il president da la conferenza da las directuras ed ils directurs da sanadad chantunals. El partia la valitaziun che la situaziun actuala saja intscherta . Gist perquai na sajan ulteriuras schluccadas betg giustifitgadas, uschia Engelberger envers SRF.

Atgnamain avessan ils chantuns la gievgia da survegnir propostas per novas schluccadas. Il Cussegl federal ha dentant infurmà che naginas ulteriuras schluccadas sajan prevesidas.

audio
Per tadlar: curt e cumpact
00:58 min, RTR Audio dals 29.07.2021.
laschar ir. Durada: 00:58 minutas.

RTR novitads 20:00

Artitgels legids il pli savens

Scrollar a sanestra Scrollar a dretga