Siglir tar il cuntegn

Header

cuntegn

Per tge vai? Refurma da l'AVS

Il problem è enconuschent gia daditg: A l'AVS mancan a lunga vista ils daners. Cun questa ulteriura refurma duai l'Assicuranza per vegls e survivents vegnir stabilisada. Formalmain consista la refurma «AVS 21» da dus projects da votaziun.

audio
Adrian Camartin declera la refurma
ord Actualitad dals 31.08.2022.
laschar ir. Durada: 5 minutas 55 Secundas.

Per l’ina vai per auzar la vegliadetgna da pensiun da las dunnas e per l’autra per auzar la taglia sin la plivalur. Davart omaduas fatschentas decida la Svizra a l'urna ils 25 da settember. I dovra dentant in Gea dubel.

Duas fatschentas – ina refurma

Avrir la box Serrar la box

La refurma da l'AVS consista da duas votaziuns:

Per l'ina duain las dunnas lavurar in onn pli ditg – pia enfin 65 onns sco ils umens. Damai ch'in referendum è reussì, decida il pievel.

Per l'autra vai per auzar la taglia sin la plivalur a favur da l'AVS. Questa midada pertutga la Constituziun federala e cunquai è il suveran clamà automaticamain a l'urna.

Las duas fatschentas èn colliadas, quai munta: Sch'il suveran refusa ina da las duas fatschentas, fa l'entira refurma naufragi.

Las contribuziuns che Svizras e Svizzers pajan a l’Assicuranza da vegls e survivents na bastan en l’avegnir betg per pajar las rentas a persunas che van en pensiun. Tenor calculaziuns da la Confederaziun mancan ils proxims 10 onns en tut 18,5 milliardas francs. La refurma «AVS 21» vul perquai stabilisar l’AVS enten spargnar extradas e generar dapli entradas.

La refurma cun las differentas mesiras porta en total 17,3 milliardas francs en la cassa da l'AVS.

Tuttina mancan anc 1,2 milliardas francs per ils proxims diesch onns, tenor calculaziuns da l'Uffizi federal d'assicuranzas socialas. Il Parlament federal ha annunzià da vulair schliar quest problem cun ina proxima refurma da l'AVS.

Insumma: Il parlament a Berna ha discutà a moda cuntraversa questa refurma. Malgrà che la necessitad e l'urgenza è stada clera en tut las partidas, han ils detagls procurà per chaus cotschens. La finala èn Cussegl naziunal e Cussegl dals stans sa cunvegnids sin in cumpromis e proponan ensemen cun il Cussegl federal d'acceptar omaduas votaziuns en connex cun l'AVS.

In’allianza da sindicats, partidas sanestras ed organisaziuns da dunnas han inoltrà in referendum cun passa 150'000 suttascripziuns cunter l'intent d'auzar la vegliadetgna da pensiun per finanziar l'AVS.

Il muster è cler: Partidas sanestras cumbattan la refurma – partidas burgaisas sustegnan ella. Pliras partidas ston dentant anc decider uffizialmain lur posiziun a radunanzas da delegads.

Svizras e Svizzers èn clamads ils 25 da settember a l'urna per decider davart las duas fatschentas co stabilisar l'AVS.

Dossier online

Avrir la box Serrar la box
Dossier online
Legenda: Grafica RTR

Sin in clic tut davart las votaziuns dals 25 da settember.

RTR votaziuns 2022

Artitgels legids il pli savens

Scrollar a sanestra Scrollar a dretga