Tegnair distanza, prender ils chauns vid la corda e betg tutgar en vadels. Cun questas trais simplas reglas possian ins sminuir marcantamain il ristg d'accidents tar inscunters cun vatgas-mamma. Sco las duas organisaziuns communitgeschan, hajan ellas lantschà la campagna per prevegnir ad accidents cun vatgas-mamma durant la stad da corona 2020. Lura eran spezialmain bleras viandantas e viandants senza experientscha per trutgs e pitgognas.
Las vatgas sajan en general animals fitg paschaivels, scrivan las duas organisaziuns. Ellas hajan dentant in ferm instinct da protecziun e defendian perquai lu vadels, sch'ellas sa sentian periclitadas. Uschia possian ils animals – che paisan savens passa 600 kilos e pon sa muventar cun ina sveltezza da 40 kilometers l'ura – daventar in privel per ils umans.
L'associaziun fa en spezial attent ils possessurs da chauns. Ils chauns regordian las vatgas vi da lur inimi natiral, il luf e perquai sajan chauns adina da tegnair vi da la corda. En general duaja vegnir fatg ina gronda storta enturn vatgas cun vadels.
Ord l'archiv:
