Ils ins han forsa anc en bursa el, smuglià e sblatgì cun ina fotografia ch'i ha dà da quel temp per pauc or d'in automat. Ina fotografia da temps passads, era ella sblatgida che mussa però giuvnas e giuvens superbis d'avair dumagnà l'examen d'ir cun auto e da tutgar latiers, tar la gronda gruppa da las automobilistas e dals automobilists. In cudeschet blau, il permiss dad ir cun auto, in document per blera libertad ed independenza.
La libertad e l'independenza restan bain, il cudeschet blau è però bainprest istorgia. Fin la fin d'october ston era ils davos permiss dad ir cun auto en furma da palpiri vegnir barattadas cun ina cartina da plastic che correspunda als standards da segirezza internaziunals. Il cudeschet blau è davent da lura definitavamain be pli nostaligia.
Sco quai che Claudio Reich, il manader da l'Uffizi da traffic chantunal ha ditg sin dumonda da RTR, funcziuna quest barat actualmain bain. Bleras e blers hajan gia barattà lur permiss.
Anc betg barattà il permiss han cunzunt persunas ch'èn en l'exteriur e che nus na cuntanschain perquai betg u persunas pli veglias che na prendan betg si contact cun l'uffizi, forsa era perquai ch'ellas na vulan gnanc pli ir cun auto.
Il cumenzament d'avust vegnevan anc nizzegiadas 9'000 permiss dad ir cun auto en furma da palpiri en il Grischun. Tut questas persunas hajan survegnì ina brev da l'uffizi e sajan perquai infurmadas, di Reich.
Tgi che vegn traplà paja 20 francs
Tgi che vul salvar ses permiss dad ir cun auto nostaligic, quasi sco regurdientscha a temps passads, dastga far quai. Vegn'ins però en ina controlla da la polizia datti consequenzas a partir dal november.
Tgi che vegn en ina controlla da la polizia cun il permiss vegl sto quintar cun ina multa da 20 francs. Quai almain en Svizra.
En l'exteriur saja la situaziun in zic autra, e na, betg main problematica, agiunta Claudio Reich. El fetschia explicitamain attent che tgi che charreschia cun in permiss dad ir cun auto nunvalaivel en l'exteriur, possia survegnir problems pli gronds cun la polizia.
Per tuts e tuttas che han da barattar il permiss dad ir cun auto datti ils formulars correspudnents tar l'Uffizi da traffic. Per survegnir il nov permiss da plastic en furma d'ina carta da credit, dovri en pli ina fotografia nova, ina copia da la carta d'identitad u dal pass e dal permiss vegl che vala anc fin la fin d'october.