Il Cussegl federal vuleva francar en la lescha che persunas ch'abitan dapi 10 onns en Svizra ed èn integradas survegnan la permissiun da dimora la legitimaziun uffiziala C. Ozendi survegnan talas persunas in permis C, dentant senza avair il dretg.
Nagin automatissem
Sco gia il Cussegl dals chantuns ha er la chombra gronda refusà d'introducir in tal automatissem. La ministra da giustia Simonetta Sommaruga ha dà da prender en consideraziun ch'i na dettia tenor la nova lescha dals dretgs da burgais nagina pussaivladad pli da tschentar la dumonda da natiralisaziun senza permissiun da dimora. I fissia coerent da prevesair il dretg sin la permissiun.
Degradar permissiun C sin B
Il Cussegl naziunal ha er decidì che las autoritads pon revocar ina permissiun da dimora C, respectivamain pon degradar la permissiun C ad ina permissiun B, sche la persuna n'è betg pronta da s'integrar en la Svizra. Senza success ha Sommaruga argumentà che quai portia nagut auter che blera birocrazia.
Dretg da reuniun da famiglia
En quest punct è il Cussegl naziunal suandà il maini dal Cussegl federal. Persunas admessas provisoricamain duain avair il dretg da far vegnir en Svizra lur partenari ed ils uffants suenter trais onns.
RR novitads 12:00