La hotellaria svizra ha registrà dapli pernottaziuns - la stagiun da stad passada. Er en il Grischun èn las cifras idas ensi. Ils hoteliers grischuns han nudà dal matg fin l'october in plus da var 3 pertschient, cumpareglià cun la stad 2018. Quai mussan las pli novas cifras da l'Uffizi federal da statistica. Ils pli ferms augments hai dà en il chantun Vallais ed en la regiun dal Lai da Genevra.
En l'entira Svizra han ils hotels nudà la stad passada 22,6 milliuns pernottaziuns. Quai correspunda ad in plus da 2,4 pertschient. Il pli grond augment hai dà il zercladur cun 5,1%. Il pli pitschen plus è vegnì nudà il settember cun 0,2%.
Dapli giasts or dals Stadis Unids
Durant l'entira stagiun è vegnì registrà in plus tant tar giasts or da la Svizra sco er or da l'exteriur. Tar ils giasts or da l'exteriur è il dumber creschì per 2,1% sin 12,9 milliuns.
Ina gronda cumpart da la dumonda or da l'exteriur è d'engraziar als giasts dals Stadis Unids. Là è il dumber creschì per 9,5% – il pli grond augment da tut ils pajais. Er la dumonda or da l'Europa è creschida per 1,4%. Stagnà è percunter il dumber da giasts asiatics – quai cunzunt pervia dal regress da dumondas or dals Stadis dal Golf (-12%) e da l'India (-4,4%).
RTR novitads 10:00