L'onn passà ha la Confederaziun impundì radund 2,6 milliardas francs per la perscrutaziun ed il svilup. Quai è 413 milliuns francs damain che anc il 2019 – quai che correspunda ad in minus da 15,9%. La raschun principala attribuescha l'Uffizi federal per statistica al fatg che la Svizra n'è betg associada al program da perscrutaziun ed innovaziun da l'Uniun europeica «Horizon Europe». Ils daners che fissan stads previds per il program europeic duain però ussa ir a programs naziunals. Quai sco mesira transitorica direct a perscrutadras e perscrutaders en scolas autas en Svizra.
Dapli daners per il Fond naziunal svizzer
Entant ch'ils daners da perscrutaziun pajads a projects en l'exteriur sa reduceschan, èn ils daners per projects en Svizra creschids sin 1,6 milliardas francs (+8%). La pli gronda part da quests (1,1 milliardas) èn ids al Fond naziunal svizzer per la perscrutaziun scientifica (SNF). Era ils meds finanzials per agens projects da perscrutaziun ha la Confederaziun auzà per 8% a 231 milliuns francs.
Augmentà sustegn per agens programs
Ils agens programs da perscrutaziun da la Confederaziun sa concentreschan surtut en il sectur da l'agricultura. Però era la perscrutaziun en la defensiun, la producziun industriala e tecnologia, las structuras socialas e l'ambient vegnan sustenidas. En quel senn è il dumber dal persunal creschì per 106 persunas sin total 2'184 perscrutadras e perscrutaders ch'occupeschan 1'095 plazzas entiras.
