Durant l'emprim mais en funcziun èn vegnidas inoltradas 1'178 denunzias, ha communitgà la manadra da fatschenta da Netzcourage, Jolanda Spiess-Hegglin sin Twitter. Quai mussia quant impurtant che quest generatur saja.
Las bleras denunzias hai dà dal chantun Turitg, numnadamain 211. Sco segund è suandà il Vad cun 197 denunzias e lura Basilea-Citad cun 89.
Dentant n’èsi betg cler, en quants cas ch’i ha la finala vairamain dà ina denunzia tar la polizia. La denunzia-online sto numnadamain vegnir squitschada, suttascritta ed inoltrada a la procura publica ch’è mintgamai responsabla en il chantun.
Tar la conferenza da procuraturs publics svizzers (SSK) dal mars, hai gì num che nagin tool cumparegliabel saja fin uss enconuschent. Ins possia parter dal fatg ch'ina annunzia da quest generatur saja dentant valaivla e possia vegnir acceptada. Il tool paria da garantir che las datas necessarias sajan avant maun. En il singul cas, stoppia la procura publica dal chantun pertutgà elavurar il cas.