Tranter ils onns 2019 enfin 2029 dovria la branscha da sanadad 43'400 novas persunas sin stgalim terziar e 27'100 persunas tar il persunal da tgira dal stgalim da la secundara II. Cun la nova generaziun che stettia a disposiziun, quintan ils auturs dal rapport a pudair cuvrir 67% respectiv 80% dal basegn. Questa prognosa sa basa sin in'ulteriur augment dal dumber da persunas che fan la scolaziun en ina professiun da tgira, suenter ch'ins ha gia augmentà ils ultims onns las stentas per la scolaziun.
Dapi il 2012 enfin il 2019 è il dumber da persunal da tgira gia creschì per 29'100 persunas. Quai è in augment da 19%. Il pli ferm saja creschì il dumber tar la Spitex (+39%), suandà dal persunal da tgira en chasas d'attempads (+17%) sco era en ospitals e clinicas (+13%).
Basegn d'agir resta
Malgrà quests buns resultats, na possian ins dentant betg reducir las stentas. Malgrà il svilup legraivel e las prognosas tar la scolaziun en la tgira, dettia anc adina ina gronda largia tranter la purschida e la dumonda. Questa largia vegnia ozendi savens serrada entras persunal da l'exteriur. Tar il persunal diplomà fetschia questa cumpart or radund 30%, gaurdà sur l'entira Svizra. Regiunal dettia dentant fitg grondas differenzas.
La pandemia da corona ha mussà a nus sur tut en ils chantuns da cunfin che quai po dar gronds ristgs e che quai metta en privel noss sistem da sanadad
Mantegnair il persunal da tgira
Dasper ulteriuras stentas tar la scolaziun, dovria perquai er sur tut mesiras per mantegnair il persunal da tgira. Vitiers tutgia er da pudair cumbinar meglier la lavur cun la famiglia sco er da lavurar en bain il persunal. Er tar la planisaziun da la carriera, il svilup en il job e per promover talents dettia anc potenzial, hai gì num vinavant. Quai saja bain en emprima lingia chaussa dals manaschis. La politica e las autoritads stoppian dentant stgaffir las cundiziuns da rama necessarias e metter a disposiziun avunda meds.