Siglir tar il cuntegn
cuntegn

Svizra Persunal qualifitgà anc adina stgars

En Svizra è la mancanza da persunal qualifitgà sa pegiurada levet quest onn. Tut tenor las gruppas da professiun datti però grondas differenzas. Quai resulta dal monitoring dal martgà da lavur d'Adecco e da l'universitad da Turitg.

In element da stiropor cun scrit si «Fachkraft».
Legenda: La situaziun sin il martgà da persunal qualifitgà è daventada anc in zic mendra. Keystone

Entant ch’entginas professiuns han memia pauc persunal qualifitgà han autras memia bleras persunas qualifitgadas. Ina mancanza acuta datti en l'entira Svizra tar ils inschigners, tecnica ed informatica. Ed era en il sectur d'administraziun fiduziaria èn persunas qualifitgadas raras. Las interpresas hajan difficultads da chattar avunda e bun persunal per quellas professiuns, ha ditg Nicole Burth, la scheffa dad Adecco Svizra. Era las professiuns da sanadad han memia pauc persunal, e quai gia dapi onns.

Memia blera glieud per memia paucas plazzas

Tar professiuns da la gastronomia e da construcziun percunter ... datti dapli persunas che tschertgan lavur che plazzas libras. Cunquai ch’in grond dumber dals emploiads lavuran en ina branscha cun ina fluctuaziun da persunal pulit auta dat quai ina gronda concurrenza en las professiuns pertutgadas.

RR novitads 8:30