Tenor il rapport da cuntentezza dal mund 2018 occupescha la Svizra la plazza 5 en la rangaziun dals pli cuntents, quai suenter ils pajais nordics. Dentant emigreschan mintg’onn persunas svizras en l’exteriur. Passa la mesadad en ils pajais vischins en l’Europa.
Ma jau vai bandunà la Svizra perquai ch'ins ha offert a mi d'ir en Italia ad occupar ina plazza da lavur. Quai era l'onn 1969. Ussa èn quai 50 onns ch'jau sun là, ed jau na ma muvent pli.
Ils scopos, quels èn differents. Ils ins tira l’amur en l’exteriur, ils auters la professiun. E lura datti quels che tschertgan in midament u in’aventura en la vita.
Laschar encrescher
Igl èn ils clischés che laschan encrescher. Dal chaschiel, la tschigulatta enfin tar las muntognas. Dentant era per la punctualitad e l'urden laschan ellas ed els encrescher.
L'urden e la punctualitad en Svizra am mancan schon in pau. A Chile è tut in zic caotic.
Plitost las tradiziuns svizras mancan als Svizzers en l'exteriur, dentant festiveschan e vivan els quellas era en lur patria tschernida.
Congress a Visp
Quests dis ha lieu a Visp la conferenza da l'Organisaziun da las Svizras e dals Svizzers en l'ester. Duas giadas l’onn s’inscuntran las commembras ed ils commembers da l’organisaziun en Svizra. Quai per discutar temas che preoccupeschan las emigrantas ed ils emigrants svizzers.