Tut en tut hajan scolaras e scolars pers passa in terz da la materia d'emprender d'in onn da scola. En Svizra dentant be radund in 6avel da la materia. En il rom da matematica saja il deficit bler pli marcant che tar il leger, scrivan ils auturs dal studi che derivan da la Frantscha, la Svezia e la Gronda Britannia. Il studi è cumparì en il magazin dal fatg «Nature Human Behaviour». Els argumenteschan quai cun il fatg che geniturs ed uffants legian pli tgunsch ensemen a chasa che da far quints.
Raschun per ils deficits sajan las scolas ch'èn stadas serradas durant la pandemia. Ils auturs stiman che 95% da tut ils scolaras e las scolaras sin l'entir mund èn stads pertutgads. Problems da la sanadad psichica sco er fisica pudessan anc avair rinforzà quest deficit.
Patì il pli fitg ha il progress tar uffants cun in status socio-economic bass.
Quai demussa che las differenzas da la scolaziun tranter uffants da differentas relaziuns èn anc creschidas durant la pandemia.
Ils deficits n'èn betg sa reducids
Ils auturs e las auturas dal studi han er constatà ch'ils deficits èn bain cumparids gia baud durant la pandemia, els n'èn dentant ni sa pegiurads ni sa meglierads en il fratemp. En pajais cun entradas medias en la media, sco la Brasilia ed il Mexico è il deficit pli grond ch'en pajais cun entradas medias pli autas, sco en Svizra u ils Stadis Unids e la Gronda Britannia. Quant ferm ch'uffants èn pertutgads en pajais cun entradas medias bassas, n'è betg enconuschent. Da tals pajais na dettia nagins studis cumparegliabels.