Suenter in onn da record è la racolta da mel d'avieuls en Svizra crudada ensemen massivamain quest onn. La raschun saja la blera plievgia, la granella e las inundaziuns, communitgescha l'associaziun tetgala da las apicultruas ed dals apiculturs Apisuisse.
Pervia da la schlett'aura èsi en media be vegnì racoltà 7,2 kilos per pievel d'avieuls. L'onn avant era quai anc stà passa il quatter dubel, cun prest 30 kilos. Il Grischun è cun 2 fin 5 kilos per pievel sut la media. In'excepziun è il Tessin cun ina racolta da prest 26 kilos per pievel. Il Grischun dal sid è per gronda part vegni schanegià da la schlett'aura.
Vendita da mel
Sco consequenza da la schletta racolta, vegnan ils regals en bleras stizuns a restar vids. Intgins apiculturs pon anc profitar dal bler mel ch'i ha dà l'onn passà e vender anc da lez. Per ils blers munta l'onn 2021 dentant ina sperdita finanziala. Quai vala en spezial per apiculturs da professiun, quels na survegnan numnadamain naginas subvenziuns dal stadi. Il pauc mel ch'è denturn vegn a custar quest onn dapli, perquai ch'el è stgart.
