Curt avant las 11 ha l'aviun traversà il cunfin svizzer tar Waldshut. Da las 11.01 è alura ina patruglia da dus jets F/A-18 partì davent da Payerne. Quels han interceptà l'aviun dal tip PC12 da Pilatus, ina maschina cun in motor, sur il territori da Samedan. Els han pudì far contact da func cun il pilot ed han accumpagnà el enfin l'Italia.
L'armada quinta cun in sbagl da pilot, sco ch'il pledader da l'armada Daniel Reist di. In aviun senza contact da func saja adina in privel per la populaziun. Uschia na possian las autoritads betg instruir il pilot co sgular, u far attent sch'el sgolia per exempel memia bass. Perquai saja impurtant da reagir spert. Ils jets da l'armada èn sgulads cun spertadad suprasonica.