Siglir tar il cuntegn

Svizra Pervia da AirBnB: Cussegl federal mida lescha da locaziun

Possessurs duain pudair dar ina lubientscha generala per la sutlocaziun.

Apps per il telefonin per cudischar vacanzas.
Legenda: Differentas apps carmalan ils giasts sin lur plattafurmas da cudeschar. RTR, Adrian Camartin

Ozendi èsi uschia ch'il locatari sto mintga giada dumandar il possessur per lubientscha, sch'el vul sutaffittar sia abitaziun u era mo ina stanza per in temp ad insatgi auter. Il possessur ha lura duas emnas temp da decider, sch'el va d'accord cun la sutlocaziun. En vista a las plattafurmas da cudeschar en l'internet è quai dentant ina procedura che na cuntenta betg pli.

Lubientscha generala per AirBnB

Il Cussegl federal vul perquai midar la lescha uschia ch'il possessur po dar ina lubientscha generala e na sto uschia betg pli s'occupar da mintga cas. Il locatari sto dentant formular ina dumonda en la quala el inditgescha tge localitads ch'el vul dar a tschains, quant che la locaziun custa maximalmain ed a quants giasts ch'el vul dar in suttetg.

Da principi ha il locatari il dretg da sutaffittar parts u l'entira abitaziun ad insatgi auter. Il possessur po refusar ses consentiment mo sch'el ha raschuns concludentas.

RR novitads 12:00