La Svizra ha consumà pli pauc energia l'onn passà. Tenor l'Uffizi federal d'energia haja quai per l'ina da far cun la pandemia e per l'autra cun las temperaturas pli miaivlas.
Damain sgols e traffic
Il consum saja ì enavos per lev dapli che 10%. Cunzunt las cifras dal traffic aviatic crodan en egl. L'onn 2020 ha la Svizra duvrà bun in terz pli pauc dal cherosin cumpareglià cun l'onn 2019. Ina reducziun hai era dà tar ils vehichels a motor. Il consum da benzin e diesel è sa sminuì per 8%. Sper la pandemia ha dentant era l'aura gì in effect. Grazia a las temperaturas miaivlas saja il consum dad ieli da stgaudar sa reducì per bun 10%.
Consum crescha probabel puspè
Questa reducziun da l'onn passà vegn dentant probabel a restar ina excepziun. Tenor l'Uffizi federal d'energia sajan auters facturs numnadamain creschids l'onn passà. Uschia saja la populaziun per exempel creschida per 0,7%. Quai haja era gì consequenzas per il dumber d'abitaziuns en la Svizra. Plinavant charreschan era dapli vehichels a motor. Il dumber è creschì per 1,3%.
