Pervia d’ina midada da sistem n’èn ils pajaments dal center regiunal per intermediaziun da lavur (RAV) e da las cassas da dischoccupaziun betg pussiblas tranter ils 19 da december ed ils 6 da schaner, sco l’uffizi per industria, mastergn e lavur scriva sin sia pagina d’internet.
L'interrupziun da sistem pertutga l’entira Svizra ed ha era influenza sin ils pajaments.
Persunas ch’èn dependentas d’indemnisaziuns per il december possian excepziunalmain inoltrar lur dumondas gia a partir dals 4 da december, per ch’ils raps vegnian pajads avant l’interrupziun. Dumondas che na vegnan betg inoltradas ad uras na possian betg vegnir resguardadas enfin il pli baud ils 6 da schaner.
Era infurmaziuns da dossiers persunals sajan limitadas. Infurmaziuns generalas ed annunzias sajan dentant pussiblas tar il spurtegl, al telefon u via formular en la rait.
