Ch’el haja ina buna rait da contacts e saja co far punts, ha Peter Hegglin ditg en in’intervista cun la «NZZ am Sonntag». Uschia pudessi el gidar da reducir in pau la tendenza, che la politica daventia adina pli polarisada. Il politicher da Zug da 57 onns ha tenor atgnas indicaziuns dasper la politica da finanzas, era interess vi da tematicas da la sanadad e da l’economia publica.
Davart las dunnas
Quai che pertutga la represchentanza da dunnas en il Cussegl federal ha Peter Hegglin ditg a la «NZZ am Sonntag», ch’el avess gugent da candidar ensemen cun ina dunna. Mesemna che vegn vul Viola Amherd - cussegliera naziunala da la PCD dal Vallais - infurmar sch'ella va en la cursa per il Cussegl federal u betg.
Pliras renunzias
Peter Hegglin è l’emprim candidat ch’entra en la cursa per succeder a cussegliera federala Doris Leuthard. Avant hai dà tar la PCD ina retscha da persunas che han desistì d’ina candidatura. Dasper il president da partida Gerhard Pfister, èn era ils Grischuns Martin Candinas e Stefan Engler sa decidids cunter ina candidatura.
RR novitads 06:00
