Siglir tar il cuntegn

Header

cuntegn

Svizra Petra Gössi: libertad ed atgna responsabladad

Ella vala sco persuna lavurusa che sa tge ch'ella vul. Mo ella vegn era taxada sco dunna che agescha a moda fitg controllada e che resta plitost sin distanza. Petra Gössi, la cussegliera naziunala dal chantun Sviz.

A partir dals 16 d'avrigl vegn ella a manar sco presidenta la PLD, la terz gronda partida da la Svizra. Libertad ed atgna responsabladad, dus principis fundamentals dal moviment liberal, furman il center ideologic da la cussegliera naziunala da la Svizra centrala che ha festivà il schaner ses 40. di da naschientscha.

audio
Saira: Tgi è Petra Gössi (PLD)?
ord Actualitad dals 15.04.2016.
laschar ir. Durada: 5 minutas 16 Secundas.

En dumondas da la societad ha ella dentant ina posiziun in pau pli conservativa che la partida. Uschia na sustegn ella betg las stentas d’avrir l'adopziun era per pers omosexuals. Quai haja da far cun sias ragischs catolicas, ha ella ditg en in'intervista. Entaifer la PLD politisescha la politichera da finanzas perquai plitost l'ala dretga.

Attaschada a sias ragischs

Creschida si è Petra Gössi a Küssnacht al Rigi en il chantun Sviz. E là abitescha ella anc oz. Sco buoba vuleva ella daventar biologa da la mar. El gimnasi ha ella midà maini. Restà è enfin oz il plaschair dad ir a sfunsar. Studegià ha ella giurisprudenza a Berna. Oz lavura ella a Turitg en ina firma nua ch'ella cusseglia interpresas en dumondas da taglia e da la gestiun.

Il pass en la politica ha ella fatg plitost casualmain. Il 2004 ha ella candidà per la PLD Sviz per las elecziuns chantunalas. A lezza mancavan anc dunnas giuvnas sin la glista. Nunspetgadamain è ella vegnida elegida. Quell'experientscha ha sveglià en ella il plaschair per la politica. Pli tard è ella daventada schefa da fracziun, il 2011 il pass el Cussegl naziunal ed in onn pli tard ha ella surpiglià il presidi da la partida chantunala.

Ed ussa vul ella surprender il presidi da la partida naziunala. Quai cun ina clera finamira: Engrondir la basa da la partida ed il medem mument salvar in cler profil.

Nus essan quella partida che tschertga soluziuns per il futur e che vul ina avertura da la Svizra. Per che la glieud chapeschan per tge ideas che nus s’engaschain duvrain nus ina clara lingia e stuain pudair communicar quai era vers anora. Quai vegn ad esser nossa lavur per ils proxims onns.
Autur: Petra Gössi Cussegliera naziunala PLD

Betg mo la PLD survegn in nov president. Cun Gerhard Pfister tar la PCD ed Albert Rösti tar la PPS elegian era tschellas duas partidas burgaisas grondas in nov president. Blers observaturs vesan en quella coincidenza la schanza per in'avischinaziun ed ina collavuraziun pli stretga da quellas partidas. Petra Gössi relativescha quellas spetgas.

«L’emprim stuain nus definir nossa posiziun e silsuenter stuain nus chattar maioritads. Nua che nus chattain quella maioritad è per mai da secunda prioritad.»

En dumondas davart la relaziun da la Svizra cun l'UE sappian quai era esser ils socialdemocrats, cura ch'i giaja per dumondas fiscalas plitost la PDC e la PPS.

Mo ussa vegn l’emprim l’elecziun tras la radunanza da delegads da la PLD. Concurrenza na sto ella betg temair. Ella è la suletta candidata. Il presidi empermetta bain visibilitad e prestige, el pretenda dentant era sacrifizis. Quai sa Petra Gössi.

Ella vegni anc dapli ad esser sin viadi. Mo quai saja simplamain part dal job. Ella saja dentant era persvadida che gist il barat cun autras persunas dettia enavos bler.

Artitgels legids il pli savens