L'iniziativa pretenda ch'il text da l'iniziativa da la PPS davart l'iniziativa d'immigraziun da massa, ch'è daventà dretg constituziunal, vegnia stritgà. Tenor ils iniziants n'èsi betg cler, schebain l'iniziativa da la PPS sa lascha insumma realisar senza stuair visar las cunvegnas bilateralas cun la UE.
L'iniziativa è vegnida lantschada il december 2014 e gia l'avust ha il comité rimnà las 100'000 suttascripziuns necessarias. La gruppa RASA è tenor atgnas indicaziuns in'iniziativa da burgais e betg da partidas. Ella vegn sustegnida d'organisaziuns e da pliras tschient persunas privatas, tranter auter era da persunalitads ord la politica, l'economia, la perscrutaziun e la cultura.
Sustegnida vegn l'iniziativa tranter auter da l'anteriura cussegliera federala Micheline Calmy-Rey, l'anteriur derschader federal Giusep Nay, l'artista Pippilotti Rist, il ballapedist Andy Egli, il claun Dimitri u era l'interprendider e milliardari Hansjörg Wyss. L'emprim sutsegnà è il rappunz Greis.
RR novitads 10:00