Il pilot sparì da l'aviun militar F/A 18 è mort. Quai communitgescha il Departament federal da defensiun. Il pilot militar da professiun da 27 onns saja vegnì identifitgà senza dubi tranter tocca dal vrac al lieu da l'accident en la regiun dal Pass dal Susten.
Tschertgà bunamain dus dis
Plirs helicopters da l’armada e da la Rega èn stads en acziun la mesemna dapi las 07:00. Er truppas a terra han sustegnì la tschertga. L'armada condolescha als confamigliars. Lezs vegnan tgirads dal CARE-team da l'armada.
La fitg bun’aura saja in agid per las forzas che sajan a la tschertga, aveva ditg il pledader da l’armada Daniel Reist l'avantmezdi.
Il glindesdi suenter la crudada ed il mardi aveva la schlett’aura engrevgià la tschertga per l’aviun ed il pilot sparì.
Motiv anc betg enconuschent
Il motiv per la crudada da l’aviun da cumbat vegn intercurì da la giustia militara. Ils proxims dis vegn la tocca dal vrac salvada dal difficil intschess autalpin che sa chatta en in'autezza da sur 3'000 meters sur mar.
Il lieu da la crudada restà serrà per alpinists fin ch’il salvament è terminà. Plinavant vala ina zona da scumond da sgol.
Crudada en rom d’in sgol da trenament
L’aviun d’in sez F/A-18 è partì sco segund da la plazz’aviatica militara a Meiringen en rom d’in sgol da trenament, 15 secundas davos il manader.
In emprim appel da func da la centrala ha il pilot respundì confurmamain. Il segund appel n’ha il pilot dentant betg pli respundì. Il vrac da l’aviun era vegnì chattà ord l’aria il mardi enturn mezdi en la regiun «Hinter-Tierberg».
RR novitads 10:00+
