Siglir tar il cuntegn

Header

cuntegn

Piztgadas da raischens Nagin record, però sin aut nivel

Ils raischens èn puspè da viadi, dapertut là nua ch'igl è verd. Tenor las piztgadas registradas fin il matg 2022 na vegnia quest onn betg a dar in onn da record. Dentant restan las cifras sin in nivel aut en congual cun avant 10 onns.

audio
Raischens èn activs la primavaira
ord Actualitad dals 15.06.2022.
laschar ir. Durada: 3 minutas 12 Secundas.

En il guaud, sin prads, en il parc ed en ierts sa chattan ils parasits. Raischens han gugent las temperaturas ed il clima da la primavaira e da la stad. Ils raischens stattan bain sch'il termometer mussa enturn 20° celsius, sch'i plova tranteren e sch'igl è umid.

Uss essan nus sin in nivel pli aut da piztgadas da raischens che avant 10 onns.
Autur: Werner Tischhauser vicepresident da la lia da raischens

Avant 10 onns haja dà 100 enfin 200 cas da FSME e circa 10’000 infecziuns da borreliosa. FSME è ina ina inflammaziun dal tscharvè, cunter quai datti la virola. Durant l’onn da record 2020 hai dà 452 cas da FSME e 15’500 cas da borreliosa en Svizra. L’ultim onn e l’onn actual èn las cifras sa reducidas marcantamain, però èn quellas anc adina sin in nivel aut.

Ils mais schaner fin matg da l'onn 2022 èn vegnids registrads 38 cas da FSME, l'onn 2020 èn quai stads 114 cas e l’onn passà 56 cas en l'entira Svizra.

Il fatg che nus restain sin quest nivel aut duess dar da pensar.
Autur: Werner Tischhauser vicepresident da la lia da raischens

En Svizra maina pli pauc che 1% da las piztgadas ad in'infecziun da FSME e paucs pertschients a borreliosa. Tuttina saja immens impurtant d'evitar piztgadas, quai per exempel cun vestgadira lunga en pastgs, cun sprays cunter insects e cun palpar tut il corp per far la segira che nagin raischen è vi da la pel.

S'infurmar via applicaziun

Sin l'app «Zecke» da raischens vesan ins quant grond ch'il privel è actualmain en in territori. Mintgin e mintgina po registrar la piztgada e vegn lura accumpagnà cun infurmaziuns da l'app. La Scola auta turitgaisa per scienzas applitgadas (ZHAW), la Confederaziun e la lia da raischens rimnan infurmaziuns sin l'app enturn piztgadas da raischens.

App da raischens en il territori da Cuira
Legenda: En l'app da raischens inditgeschan puncts cotschens e mellens quant grond ch'il privel è. RTR, Milena Bassin

RTR actualitad 11:00

Artitgels legids il pli savens