Sco la SBB communitgescha restia la situaziun dentant critica. Retards da prender en funcziun novs trens, adina dapli passagiers, retards sin ils trajects ils pli frequentads sco era ina situaziun critica tar il persunal engrevgeschian las stentas. Emprimas mesiras vegnian realisadas gia cun la midada d'urari il december.
Coordinar las partenzas
Ina da las mesiras saja «first in - first out». Vul dir: En l'avegnir parta quai tren ch'è pront l'emprim. Uschia vegnia impedì ch'il retard d'in singul tren haja in'influenza sin ils auters trens. Questa mesira vegn introducida sco emprim en la staziun da Spiez (BE), nua che mintgamai dus trens Intercity (in da la Part Sura Bernaisa e l'auter dal Vallais) arrivan bunamain il medem temp. Oz è fixà ch'il tren dad Interlaken parta trais minutas avant il tren da Brig.
Memia paucas reservas
La SBB conceda er sbagls. Ella haja tranter auter negligì ils ultims onns la planisaziun da basegn, planisar ils servetschs e la furmaziun dals locomotivists. En general haja il sistem da tren memia paucas reservas da temp.
RR novitads 12:00