Siglir tar il cuntegn

Svizra Plans da spargnar da la SBB laschan ir sin las barricadas

Passa 300 persunas han demonstrà cunter ils plans da reducir plazzas avant la sedia principala da las Viafiers federalas a Berna.

In um tegna in placat cun scrit si: nus na vulain betg staziuns fantom e trens fantom.
Legenda: Emploiads da la SBB demonstreschan avant la sedia principala da la SBB a Berna Keystone

Ils demonstrants èn suandads in appel dal sindicat dal persunal da traffic SEV. Lur protesta sa drizza cunzunt cunter il project RailFit 20/30 che prevesa da reducir 1'400 plazzas fin il 2020. Quai pericliteschia la segirtad dal manaschi e la qualitad dal service public.

«I dovra puspè glieud a las staziuns»

Suenter che la SBB ha annunzià las mesiras da RailFit, ha il SEV organisà otg reuniuns en tut la Svizra. Sias pretensiuns èn cleras: I dovria puspè glieud a las staziuns ed en ils trens. La strategia da la SBB da stritgar plazzas nun haja betg senn sch’ins resguardia ch’il traffic avess dad augmentar ils proxims onns.

SBB vul pajar damain

Il sindicat dal persunal da traffic protesta era cunter la sbassada da paja che la direcziun da la SBB planisescha. Quella vul stritgar 0,8% da la paja da tut ils emploiads a partir dal 1. da schaner 2017. Questa mesira tutga surtut ils collavuraturs cun pitschnas pajas, damai la glieud per tgi mintga franc quinta, ha ditg Manuel Avallone, il vicepresident dal SEV.

Suenter la demonstraziun dad oz planisescha il SEV planiseschia anc ulteriuras acziuns. Quellas dependan da la reacziun da la SBB.