Per emetturs da televisiun e plattafurmas da streaming duai dar las medemas reglas. Emetturs commerzials sco 3+ ston per exempel sa tegnair vid diversas reglas da la protecziun da giuvenils u ch'els han reglas europeicas davart cuntegns, declera Manuel Puppis, scienzià da medias e co-autur da la posiziun vers il Cussegl federal.
A nus vai per stgaffir medemas cundiziuns per tut ils purschiders.
La concurrenza americana ha blers daners
Netflix, Apple ed Amazon Prime han midà a moda fundamentala il martgà da televisiun. Il mars vegn lura anc vitiers Disney+. Ina raschun persuenter: La concurrenza dals Stadis Unids ha daners. Fitg blers daners, manegia l'expert da streaming da Berlin, Marcus S. Kleiner.
Quai sa mussia per exempel vi da la seria da success da Netflix «House of Cards». Els garanteschian duas staflas e din als reschissurs e producents ch'els pon far tge ch'els vulan. Questa furma, d'esser finanzialmain segir ed avair ina perspectiva ch'i dat duas staflas, quai na possian nagins emetturs da televisiun garantir, di Kleiner.
Promover meglier atgnas producziuns
Quai haja midà a moda fundamentala las premissas per la televisiun ed er stgaffì in nov problem, di Puppis.
Nus vesain che Netflix ed Amazon sa spezialiseschan fermamain sin ina purschida da divertiment, dentant betg sin l'infurmaziun. Els na produceschan n'er betg en Svizra. Il sulet ch'emetturs svizzers pon far per sa differenziar e per sa profilar tar il public è da promover atgnas producziuns svizras.
La EMEK pretenda perquai da la politica dad er sa fatschentar cun la tematica co ins pudess promover meglier purschidas d'infurmaziun ed atgnas producziuns svizras.
RTR novitads 09:00