L'acziun da protesta è vegnida organisada via medias socialas. Ina demonstraziun sco tala n'èsi dentant betg stà. Las associaziuns da töffists en Svizra avevan s'exprimì cunter ina demonstraziun. I na saja anc betg temp – ins veglia all'entschatta anc empruvar cun la via politica.
Motiv per l'acziun èn duas iniziativas parlamentaras che la cussegliera naziunala Gabriela Suter (PS/AG) ha inoltrà durant la sessiun da zercladur. Per l'ina pretenda ella ina basa legala per far diever da radars da canera. Per l'autra pretenda ella in scumond general per töffs cun dapli che 95 decibels en il star.
Malgrà corona n'han ils participants sin la plazza federala betg purtà mascrinas. La polizia ha observà la protesta, n'ha dentant betg intervegnì.