Siglir tar il cuntegn
Inhalt

Svizra PLD: Johann Schneider-Ammann va e 3 vulan succeder

Il cusseglier federal Johann Schneider-Ammann va en pensiun. Per sia successiun sa mettan a disposiziun il cusseglier dals chantuns da la Sutsilvania, Hans Wicki, il cusseglier guvernativ dal chantun Schaffusa, Christian Amsler, e la presidenta dal cussegl dals chantuns Karin Keller-Sutter.

RTR: Sch’ins legia e taidla enturn, lura pari che Karin Keller-Sutter è gia tant sco elegida. E quai propi uschia?

Fabia Caduff: Tant sco elegida è in zic exagerà. Però igl è schon uschia, che Karin Keller-Sutter è la absoluta favurita en la cursa per la successiun da Johann Schneider Ammann.

Tgenins èn ils motivs per sia rolla sco favurita?

Per l'ina è la San Gallaisa dapi il 2011 en il Cussegl dals chantuns ed ha pudì bajegiar si ina buna rait a Berna. En quel temp ha ella er pudì sa profilar sin il parchet da la politica naziunala. Era vegn ella adina puspè ludada per sia funcziun actuala sco presidenta dal Cussegl dals chantuns. Il satgados d'experientscha politica da Karin Keller-Sutter è però er emplenì uffizis politics sin livel chantunal. Uschia è ella stada commembra dal parlamant e cussegliera guvernativa dal chantun Son Gagl.

E per l'autra ha Karin Keller-Sutter l'avantatg, ch'ella è ina dunna. Il squitsch sin la PLD dad avair ina dunna en il Cussegl federal è numnadamain grond. Quel squitsch deriva dentant plitost da la sanestra. Sur 30 onns n'ha la partida betg pli gì ina dunna sco cussegliera federala e per il mument èn mo 2 da 7 posts da la regenza occupads cun dunnas. E cun quai che Doris Leuthard ha annunzià sia demissiun restass mo pli Simonetta Sommaruga sco dunna en il Cussegl federal.

Er Hans Wicki e Christian Amsler vulan daventar cusseglier federal per la Partida liberaldemocratica. Co èn lur schanzas, sper ina favurita sco Karin Keller-Sutter?

Karin Keller-Sutter po profitar da quels che vulan ina dunna en il Cussegl federal e Hans Wicki percunter po profitar da tut quels che vulan ina persuna da la Svizra Centrala en la regenza. Tiers vegn anc che la Sutsilvania n'ha anc mai gì in represchentant en il Cussegl federal. Quai vala er per Schaffusa: Christian Amsler fiss l’emprim Cusseglier federal per il chantun.

Però lur schanzas èn moderadas. Ins legia era adina puspè ch'els dus èn candidats dad alibi. Quai che na vul dentant betg dir, ch'els dus n'avessan betg las abilitads per il post. Avant ch'el è vegni elegì en il Cussegl dals chantuns è Hans Wicki stà 6 onns cusseglier guvernativ ed el ha manà ina firma ch'è internaziunal activa. E Christian Amsler è stà president da vischnanca, parlamentari dal chantun ed è actualmain cusseglier guvernativ. Tge che manca dentant ad el è l'experientscha a Berna.

Tge stuess capitar per ch'in dad els dus avess la schanza da daventar cusseglier federal?

Ils 5 da december vegn sco emprim elegì ina successura u in successur per il post da Doris Leuthard. E per quel post è la Vallesana Viola Amherd la favurita.

Sch'ella vegn elegida, daventa il squitsch d'eleger ina segunda dunna pli pitschen. Quai pudess ir a favur dad in dad els dus. Però la schanza è plitost pitschna cun quai che Karin Keller-Sutter po quintar cun grond sustegn da tut las partidas.

Ils candidats da la PLD stattan. Però per evitar scandals vegnan tuts anc examinads...

Suenter ch'il scandal da l'anteriur candidat da la PLD Pierre Maudet è vegni a la glisch, èn las partidas vegnidas precautas. La Procura publica da Genevra renfatscha al politicher d'avair profità d'in viadi ad Abu Dhabi. L’affera Maudet aveva survegnì nov fieu, cura che retschertgas da la «Rundschau» avevan mussà, ch'ils organisaturs dal viadi da Maudet èn involvids en in grond project da construcziun a Genevra.

Per evitar ulteriurs scandals vegnan ils candidats da la PLD controllads da dus anteriurs parlamentaris e dad in activ. Era la PCD lascha far controllas da lur candidats – però betg sco la PLD da politichers. La PCD engascha 2 derschaders che guardan, sch'ils candidats e las candidatas han propi ina vesta alva.

RR actualitad 17:00