Siglir tar il cuntegn

Header

cuntegn

Pleds da prim d'avust Ils cussegliers e las cusseglieras federalas han discurrì

La cussegliera federala Karin Keller-Sutter ha accentuà a las festivitads dal prim d'avust la diversitad da la Svizra. Quella tutgia tar il pajais, ha ella ditg sin in bain puril a Hohenrain en il chantun Lucerna. Empè da cultivar foss, stoppian ins surmuntar bloccadas per chattar vias cuminaivlas.

Legenda: Keystone

Las ultimas emnas haja ella udì bler da foss – tranter citad e champagna, tranter giuven e vegl, um e dunna. Naturalmain dettia differentas modas da viver en Svizra, differents basegns ed er vistas. Quai na saja nagut nov, mabain insatge che mussia la diversitad da la Svizra, ha ditg la ministra da giustia.

Las sfidas da la Svizra na possian ins betg surventscher cun in nov cumbat cultural, ha ditg la cussegliera federala. La Svizra possia dumagnar quai be communablamain. Sco sfida ha Keller-Sutter betg be discurrì da la pandemia da corona, ma er da la digitalisaziun, cun tut sias schanzas e ristgs, sco er da segirar il provediment da vegliadetgna, ils contracts bilaterals e la basa da viver fundamentala.

Nus stuain esser abels da tadlar e da respectar l'opiniun d'auters.

Ins stoppia dar gist a persunas cun in auter pensar la pussaivladad da s'exprimer, per pudair ir en sin els e chattar ina schliaziun cuminaivla. Tar inscunters persunals saja pli simpel da far quai e da tadlar tiers.

Parmelin ha fatg l'entschatta a Herzogenbuchsee

audio
Pled da prim d'avust dal president da la Confederaziun Guy Parmelin
03:57 min, Sport ed actualitad dals 01.08.2021.
laschar ir. Durada: 03:57 minutas.

Sonda è il president da la Confederaziun stà a Herzogenbuchsee en il chantun Berna. El ha regurdà a virtids sco curascha, fidanza ed agid vicendaivel. Cun questas valurs svizras duai la Svizra ir en l'avegnir.

Jau admir las stentas da nossa populaziun, per surmuntar talas crisas – sur tut al di dad oz, nua che nus essan convocads d'exprimer la luschezza sin noss pajais.
Autur: Guy Parmelin President da la Confederaziun

Sommaruga ed Amherd al Rütli

Legenda: Viola Amherd e Simonetta Sommaruga èn omaduas stadas sin il Rütli. Keystone

Il Rütli è stà en ils mauns da las dunnas. Sut il motto «Rütli da las dunnas» vegn festivà il giubileum da 50 onns dretg da vuschar da las dunnas. Tranter las pliras tschient persunas al lieu, èn er stadas las duas cusseglieras Viola Amherd e Simonetta Sommaruga. En ses pled ha ditg Sommaruga, che las dunnas occupeschian oz per pudair dir uschia il Rütli: Organisà la festa ha l'organisaziun tetgala da dunnas, Alliance F.

Quai è la Svizra – in pajais nua ch'ins po esser datiers in da l'auter, in pajais nua che bler funcziuna bain, schizunt durant temps grevs.
Autur: Simonetta Sommaruga cussegliera federala

Cassis sa drizza a Svizzers e Svizras da l'exteriur

Legenda: Ignazio Cassis è sa drizzà a Svizras e Svizzers da l'exteriur. Twitter/Ignazio Cassis

Als Svizzers e las Svizras en l'exteriur, è il cusseglier Ignazio Cassis sa drizzà. El ha fatg ses pled dal prim d'avust a moda virtuala, da Bangkok anora, nua ch'el fa ina visita uffiziala. Cassis ha menziunà la solidaritad e la pluralitad che sajan marcas da la Svizra. Ed el ha sincerà ch'il Cussegl federal s'engaschia vinavant per che Svizzers e Svizras en l'exteriur possian sa laschar vaccinar. A la Tailanda ha la Svizra tranter auter gidà cun trameter 100 apparats da respiraziun e passa in milliun sets d'antigen.

Vus [Svizras e Svizers da l'exteriur] purtais er ina buna part mund enavos en Svizra – tessais ritgezzas culturalas dal mund en las Svizras e contribuis uschia a la diversitad. Ina diversitad che fa or la Svizra en sias valurs fundamentalas.

Berset è stà a Greyerz

Cusseglier federal e minister da sanadad, Alain Berset è stà en ses chantun da chasa, a Greyerz en il Friburg.

Legenda: Keystone
Gea, nus essan in lieu da stabilitad – ma betg perquai che nus essan in pajais static. Cuntrari: Perquai che nus essan gia adina stads in pajais che vegn dinamics en in mund dinamic e resta gist perquai stabil.
Autur: Alain Berset cusseglier federal

RTR novitads 11:00

Artitgels legids il pli savens

Scrollar a sanestra Scrollar a dretga