Siglir tar il cuntegn

Header

cuntegn

Svizra Pleds festivs dal Cussegl federal

A chaschun dal 1. d'avust fan commembers dal Cussegl federal mintg'onn ils pleds tradiziunals. Intginas resumaziuns dals pleds festivs da las Cusseglieras e dals Cussegliers federals da quest onn chattais vus sutvart.

Simonetta Sommaruga

A chaschun dal 1. d'avust ha la presidenta da la Confederaziun Simonetta Sommaruga appellà al pievel da tgirar la democrazia directa. Be uschia possia la Svizra surmuntar las sfidas da l'avegnir.

Simonetta Sommaruga.
Legenda: Simonetta Sommaruga. Keystone

Ils proxims onns vegnia instradà projects politics decisivs, uschia Sommaruga. Latiers tutgia la garanzia da l'AVS e las assicuranzas socialas il cumbat cunter il stgaudament dal clima u er las relaziuns tar l'Uniun europeica. Per che tut quests projects gartegian dovria quai ina sauna economia e bunas e cleras relaziuns tar ils pajais vischins, uschia Sommaruga.

Johann Schneider-Ammann

Il federalissem e la prontadad da far cumpromiss: quels 2 elements distinguan tenor il Cusseglier federal Johann Schneider-Ammann la Svizra.

Johann Schneider-Ammann.
Legenda: Johann Schneider-Ammann. Keystone

Il recept da success sa numnia pragmatissem, ha ditg il vicepresident da la Confederaziun tar ses pled dal 1. d'avust a l'Expo Milano. Ils contacts e las relaziuns cun il mund sajan impurtants. Las cunvegnas bilateralas cun l'UE avrian a la Svizra in martgà da 500 milliuns persunas. E quai saja absolutamain necessari en in temp nua che l'economia svizra pateschia dal ferm franc, uschia Schneider-Ammann.

Eveline Widmer-Schlumpf

En ses pled dal 1. d'avust ha la Cussegliera federala Eveline Widmer-Schlumpf ludà la politica da la Svizra che procura per segirezza giuridica e per stabilitad.

La ministra da finanzas ha però er avertì da metter sin il gieu la cultura da l'equiliber. La politica da l'extrema, dals pols e dals tuns agressivs chattia pli e pli blers amis, uschia Widmer-Schlumpf en ses pled a Titterten en il chantun Basilea-Champagna.

Eveline Widmer-Schlumpf.
Legenda: Eveline Widmer-Schlumpf. Keystone

Ordavant aveva la Cussegliera federala visità in brunch sin in bain puril a Valendau en Val Stussavgia. Il manaschi a Valendau è stà in dals passa 350 bains purils en Svizra che han fatg part a l'acziun da la festa naziunala da quest onn.

RR novitads 14:00

Artitgels legids il pli savens