Per la Svizra ed il Principadi da Liechtenstein ha l'Uffizi federal da sanadad annunzia gievgia 220 novas infecziuns cun il coronavirus. Mesemna eran quai anc 193 novs cas, mardi 132, glindesdi 65 e dumengia 110. Tut en tut hai dà enfin uss en Svizra 35'022 infecziuns. En la media da 7 dis èn quai 126,4 cas, quai è in augment da 23% cumpareglià cun l'emna avant.
Enfin uss èn mortas 1'704 persunas ch'eran testadas positiv sin Covid-19, in dapli che ier.
4'312 persunas en ospital
Total han stuì vegnir ospitalisadas 4'312 persunas, cumpareglià cun il di avant èn quai 8 persunas dapli. En isolaziun sa chattan 958 persunas. En quarantina èn 3'096 persunas, ch'èn stadas en contact cun persunas infectadas. 8'912 persunas èn stadas supplementarmain en quarantina perquai ch'ellas èn turnadas d'in pajais da ristg.
Fin uss hajan ins fatg 787'786 tests sin Covid-19. Tar 5,3% da tut ils tests èra il resultat positiv.
Ina persuna dapli en Grischun
Il Grischun annunzia in cas nov entaifer in di. Uschia è il dumber d'infecziuns ussa tar 62. Bundant 250 persunas èn en quarantina.
