Siglir tar il cuntegn

Svizra Pli aut stgalim da privel da lavinas

En parts dal Grischun vala dapi dumengia saira il pli aut privel da lavinas. Ina situaziun ch'i ha la davos giada da il 1999.

Carta cun il privel da lavinas.
Legenda: En tschertas parts regia il stgalim da privel il pli aut. Institut federal per la perscrutaziun da naiv e lavinas.

En parts dal Grischun vala dapi dumengia saira il pli aut privel da lavinas. Quai munta ch'i è da quintar cun bleras lavinas spontanas. I vegn scusseglià urgentamain da far sport da naiv en quest stadi.

Fitg precara è la situaziun cunzunt en il Grischun dal nord: en Surselva, en il Partenz, en il Signuradi fin sur il Scanvetg ed il Samignun.

Dapi la sonda saira era il privel da lavinas gia grond – damai stgalim quatter.

Mesiras da segirtad a Tavau

A Tavau han las autoritads prendì mesiras de segirtad per las zonas cotschnas: Radund 30 abitants èn vegnids appellads d'ir en lieus segirs questa saira. Questa mesira vala entant fin la mesemna. Las vias per vegnir a Tavau sa chattian dentant betg en questas zonas ed uschia saja la realisaziun dal WEF tenor il stand actual mument betg periclitada.

L'aura dals proxims dis

Ed er l'aura per ils proxims dis è aura d'enviern. Fin il mardi damaun datti en las alps anc ina giada grondas quantitads da naiv nova. La pli blera naiv spetga SRF Meteo en il Vallais cun 50 fin 80 cm naiv nova. En las ulteriuras regiuns datti tranter 20 fin 50 cm naiv. Il cunfin da naiv crescha la notg sin mesemna sin 1'300 fin 1'700 meters.

RR novitads 18:00