La Svizra n'ha betg cuntanschì l'onn passà sia finamira per reducir las emissiuns da CO2. Per questa raschun vegn la taxa sin ieli e gas augmentada l'onn che vegn da 60 sin 84 francs per tonna, scriva l'Uffizi federal per l'ambient.
La taxa per 1 liter ieli da stgaudar munta en l'avegnir uschia 22 enstagl da 16 raps. Cun augmentar la taxa vul la Confederaziun stgaffir impuls per ch'i vegnia duvrà dapli energia regenerabla enstagl d'energia fossila.
Betg tuts pajan taxas
Tschertas interpresas na ston betg pajar la taxa per CO2, sche quella restrenscha lur capacitad da concurrer. Dentant ston quellas interpresas reducir lur emissiuns da CO2.
