Pli che 1 milliun datas da passagiers per il servetsch secret

Il Servetsch federal d'infurmaziuns è vegnì infurmà ils ultims onns sur da tuts passagiers sin sgols or da tscherts stadis, era sur da Svizzers e Svizras. Quai sa mussa or dal rapport annual da la Surveglianza generala dal parlament.

In policist che controllescha in pass biometric. Bild in Lightbox öffnen.

Legenda da maletgs: Las datas rimnadas als eroports svizzers pon era arrivar tar il Servetsch federal d’infurmaziuns. Keystone

Atgnamain avess il servetsch d’infurmaziuns mo dastgà survegnir las datas da burgais da stadis esters, quai sin basa da la regulaziun che valeva lura. Il zercladur passà ha il Cussegl federal adattà questa regulaziun sin dumonda dal servetsch d'infurmaziuns, uschia che quel survegn uss uffizialmain las datas da tut ils passagiers ch’arrivan or da tscherts pajais.

Dal 2012 fin il 2014 aveva il Servetsch federal d’infurmaziuns survegnì en tut passa 1,5 milliuns datas. Il 2011 eran quai anc stadas pli pauc che 9’000 datas.

I sa tracta dad infurmaziuns sur dals passaschiers. L'obligatori da dar vinavant datas al Secretariat federal per migraziun vala per sgols da linga - però era da charter - da las suandantas destinaziuns:

  • Dubai
  • Dar es Salaam
  • Nairobi
  • Pristina
  • Istanbul
  • Moscau
  • Casablanca
  • Marrakesch
  • São Paulo
  • Abu Dhabi
  • Doha
  • Peking
  • Shanghai

Da tgeninas destinaziuns ch'il servetsch d'infurmaziun vul per propi las datas da passaschiers è secret e na vegn betg communitgà.

RR Novitads 15:00