Siglir tar il cuntegn

Header

collavuratura metta cumpras en in pachet
Legenda: Las cumpras fatgas via online vegnan pachetadas en il center logistic sco qua a Bremgarten (AG). Keystone
cuntegn

Svizra Pli e pli blers fan cumissiuns via online

«LeShop», il servetsch dad online da la Migros, ha realisà l'onn 2015 ina svieuta da record. Cumpareglià cun l'onn precedent è questa creschida per 6,6% sin 176 milliuns francs.

Sco l'interpresa communitgescha, haja l'augment dal servetsch da furniziun contribuì a quest svilup. Malgrà questa svieuta da record sa prepara il supermartgà en l'internet per ina concurrenza dira.

Berninghaus: «Tals servetschs dublegeschan las cumpras»

Sper il servetsch da laschar purtar a chasa las cumpras porscha la firma che tutga a la Migros danov era la pussaivladad da far las cumpras e pustaziuns via online, e lura ir per las tastgas a las filialas da Migrolino. Tenor il responsabel per il commerzi tar la Migros, Ernst Dieter Berninghaus, èsi sa cumprovà da cumbinar las purschidas da la furniziun a chasa, il servetsch da pustaziun ed ir a prender las cumpras. Tals clients cumprian radund il dubel dals clients tradiziunals.

Fiera vegn anc pli dira cun concurrenza da l'exteriur

Ils responsabels da «LeShop» quintan vinavant da pudair crescher. Tenor ina statistica da la Credit Suisse vegn la cumpart online dal commerzi cun victualias a crescher. Quai dad 1,5% sin 3,5% ils proxims 4 onns.

La fiera vegnia però era pli dira: En la Gronda Britannia, en la Frantscha ed en la Germania dettia quai gia plirs projects da concurrents che sa preparian per la fiera. Tranter quests in dals pli gronds vendiders online «Amazon».

RR novitads 10:00

Artitgels legids il pli savens

Scrollar a sanestra Scrollar a dretga