Siglir tar il cuntegn

Header

cuntegn

Pli flexibel Adina daplirs fan servetsch militar al toc

Dapi 15 onns datti la pussaivladad da far il servetsch militar al toc. La quota da da persunas è tar maximal 15% dals militarists che pon far quest servetsch. La Controlla federala da finanzas propona da far pli flexibel questa quota e che quella duai sa drizzar al dumber d'equipas.

Cun la quota datti per annada mintgamai radund 3'600 schuldads che fan il servetsch a lunga durada. Els absolvan lur entir servetsch militar en 300 dis, senza interrupziun. Questa pussaivladad na datti dentant betg tar tut ils geners da truppas ed er betg per tuttas funcziuns.

La Controlla federala da finanzas ha examinà ils custs e l'efficacitad dal model tenor las perspectivas da l'armada, per quels obligads da far il servetsch ed economia. Tut en tut vegn la controlla da finanzas a la conclusiun ch'il model saja in'agiunta che fetschia senn ensemen cun la scola da recruts ed ils curs da repetiziun. Quels che fan il servetsch al toc, segireschian la prontadad da l'armada a curta vista. Plinavant surpiglian els ina rolla tar la scolaziun da las truppas e garanteschan prestaziuns permanentas.

Servetsch pli lung

En ina enquista haja la controlla da finanzas eruì che la dumonda per far il servetsch al toc saja bain gronda avunda. Ella vegn dentant franada in zic entras quai che persunas che fan il servetsch a lunga durada, prestan radund 55 dis da militar dapli che quels che fan ils curs da repetiziun. Quai va dentant be anc fin che l'armada 2023 vegn realisada. Lura è la differenza anc tar 35 dis.

Raschuns per far il servetsch a lunga durada èn savens ch'i va si meglier cun la professiun u la scolaziun, sco er il giavisch da simplamain gist avair rugalà la chaussa. L'enquista haja er mussà che la motivaziun durant quest servetsch saja gronda, malgrà ch'ina gronda part na vesia betg il senn en il servetsch militar.

Metter en dumonda la quota

Dapi radund 10 onns è la cumpart da quels che fan servetsch al toc tar ils 15% ch'èn maximalmain pussaivels. Durant onns cun pli paucs recruts, han ins perquai dentant pudì engaschar pli paucs che fan tras il servetsch.

Co la relaziun ideala tranter schuldads che fan servetsch al toc e quels che fan curs da repetiziun duai esser, na possia la controlla da finanzas betg giuditgar. Ma, quels che han fatg servetsch al toc, crodan or da l'inventari dal militar, er sch'els pon anc vegnir engaschads ils proxims quatter onns per acziuns.

Per questas raschuns è la controlla da finanzas da l'avis ch'i saja d'examinar sch'ins veglia laschar crudar la quota fixa u laschar ella. Quai dess dapli flexibladad a l'armada.

Ord l'archiv:

video
Ils frars Camichel da Brail han fatg servetsch militar al cunfin
Or da Telesguard dals 04.05.2020.
laschar ir

RTR novitads 10:00

Artitgels legids il pli savens

Scrollar a sanestra Scrollar a dretga