Il nov pass svizzer sa basa sin las pli novas technologias per la segirtad da documents d'identitad. Quests segns caracteristics per segirtad èn da vesair ad egl sco era sut glisch ultravioletta.
Il design dal nov passaport mussa motivs ch'èn caracteristics per la Svizra: Ils elements centrals èn l'aua ed ils culms ch'èn da vesair sin tut las paginas dals 26 chantuns. En il center stat il Pizzo Rotondo dal massiv dal Gottard, nua ch'ils pli gronds flums svizzers naschan e culan en l'exteriur.
Sco fin uss vegnan las datas biometricas segiradas sin il microchip. L'impronta dal det è spezialmain protegida. La Svizra dat dentant l'access a l'impronta dal det be a pajais ch'han ina protecziun da datas sumeglianta.
La nova famiglia svizra da pass cumpiglia il passaport ordinari, il passaport da diplomats, il pass dal servetsch, il document da viadi per fugitivs ed il pass per persunas da l'exteriur che vivan en Svizra.
Pass actuals restan valaivels
Tut ils documents d'identificaziun fin ussa, valan era vinavant, fin tar lur data da scadenza. Ed igl è vinavant pussaivel d'empustar ina cumbinaziun da pass e carta d'identitad. L'emprima mesadad da l'onn 2023 cumpara lura er ina nova carta d'identitad.
Tgi che dovra in nov pass, po far quai tar ils biros chantunals. Er ils pretschs na sa midan betg: In pass svizzer custa per persunas creschidas 140 francs e per persunas sut 18 onns 60 francs. Ina cumbinaziun inclusivamain la carta d'indentitad custa 148 respectivamain 68 francs.
