Siglir tar il cuntegn

Svizra Pli pauc protecziun per il luf

L'Uffizi federal d'ambient ha inoltrà ina dumonda a la Convenziun da Berna per reducir la protecziun dal luf. En l'entira Europa duess il luf per consequenza valair mo pli sco «protegì» e betg sco fin uss sco «ferm protegì».

Luf.
Legenda: Il luf na duai pli esser uschè ferm protegì sco fin uss. Keystone

Cun ils stadi «protegì» avessan ils pajais da la Convenziun da Berna in pli grond spazi d’agir areguard il luf. Els fissan dentant tuttina obligads da reglar legalmain la protecziun da l'animal – i na faschess però pli da basegn da lubir adina puspè excepziuns. Ultra da quai vegniss il tractament dal luf armonisà en Europa.

Convenziun da Berna

La Convenziun da Berna è in contract dal Cussegl da l'Europa per proteger animals selvadis e plantas.

En Svizra pudess il luf vegnir tractà en il futur sumegliant sco per exempel il capricorn. Gia l’onn 2006 aveva il BAFU inoltrà ina proposta sumeglianta, quella era dentant vegnida refusada. Cun la segunda dumonda reagescha il BAFU sin il dumber da lufs ch'è creschì ils ultims onns en Europa.

Ils emprims lufs èn vegnids il 1995 puspè en Svizra. Avant set onns è sa furmà l'emprim triep en Grischun. Ozendi datti trais fin quatter trieps e tut en tut radund 50 lufs en Svizra.

RR novitads 14:00