Per la dretgira èsi cumprovà che Romer aveva cugliunà ina vaiva ritga. Cun defraudar daners e sfalsifitgar documents aveva l’administratur da facultad sa sromà bunamain set milliuns francs. Ed el n'ha tenor la dretgira insumma betg vesì en ses delicts e mussà ricla.
Refusà collavuraziun
Damai che la vaiva na viva betg pli e che l'accusà ha refusà per gronda part da respunder las dumondas da la dretgira, ha quella stuì sa basar sin ils documents da banca. Plinavant era la vaiva ditg stada frestga ed era fitg intgantada da Romer.
Fatg bella vita
Cura che la vaiva era morta il 2011 en la vegliadetgna da 96 onns, eran restads sin ses conto be pli 15’000 francs. Era la facultad da sia fundaziun era davent. Cun ils daners aveva l’anteriur schef da finanzas da la citad da Zug finanzià sia vita, ed el era sa preschentà sco grond donatur tar occurrenzas.
Daners restan sparids
Tenor la sentenzia stuess Ivo Romer era pajar enavos als ertavels da la vaiva dus milliuns francs, e bunamain la medema summa ha era la fundaziun dabun. Sch'el po pajar è fitg dubitaivel, ils daners defraudads n'èn numnadamain betg da chattar. Per ch'il sentenzià na po betg fugir en l'exteriur, resta ses pass confiscà.
RR novitads 11:00