Siglir tar il cuntegn

Header

audio
Plum en plazzas da gieu
Or da Actualitad dals 12.04.2021.
laschar ir. Durada: 03:34 minutas.
cuntegn

Plum en il terren Medis e medias pretendan ina limita pli bassa

Tenor in studi dal center svizzer per toxicologia umana po gia la consumaziun da pitschnas concentraziuns da plum che sa chatta en il terren chaschunar donns a la sanadad d’in uffant. Medis pretendan perquai ch’il stadi reageschia cun sbassar la limita maximala da plum en terren svizzer.

Calcium, magnesium u calium. Tut elements ch'ins chatta en il terren, ma ch'èn betg problemtics sch'els vegnan traguttids. Il plum che sa chatta medemamain en il terratsch è pli problematic - quai cunzunt per uffants ch'èn anc vid crescher.

Toleranza da nulla

Il studi dal center da toxicologia a Basilea mussa che gia fitg pitschnas concentraziuns da plum pon donnegiar il tscharvè d'in uffant, declera il toxicolog Lothar Aicher ch’è sa fatschentà cun questa tematica. I na dettia nagina limita ch’è na saja anc betg toxica per l’uffant.

Tar chemicalias giain nus adina da quai ora ch'i dettia ina limita segira. Tar il plum n'avain nus fin ussa betg chattà quella.
Autur: Lothar Aichertoxicolog

En Svizra vala ina limita da 1'000 milligrams plum per kilo terratsch - quai saja bler memia aut. Cunquai ch'ina limita da 0 miligrams n'è betg realisabla, recumondan ils perscrutaders da Basilea da reducir la limita sin 83 milligrams, uschia ch'ils donns pussaivels pon vegnir tegnids sin in minimum.

Sbassar la limita

Era per l’uniun da medis e medias per la protecziun d’ambient èn ils resultats alarmants. Perquai pretenda l'uniun da suandar a las recumandaziuns dals scienziads. Tenor il president Martin Forter stoppia quai chapitar ton pli svelt cunquai ch'auters pajais sco l'Italia ni la Svezia hajan gia daditg decidì limitas pli bassas. Per esser confurm al temp ha l’uffizi federal per l’ambient annunzià da reducir la limita sin 300 milligrams plum per kilo terratsch - pli che quatter giadas uschè aut sco las recumandaziuns dals scienziads.

RTR actualitad 12:00

Artitgels legids il pli savens

Scrollar a sanestra Scrollar a dretga