Il Cusseglier federal Alain Berset conceda en in’intervista, ch'el avess stuì metter en dumonda pli ferm la scienza, en spezial durant l'entschatta da la crisa da corona. Quai ha el declerà durant l'intervista en l'emissiun "Gredig direkt" dad SRF.
Gist l'entschatta saja stà fitg simpel per il Cussegl federal – da simplamain tadlar sin la scienza e realisar quai che lezza haja pretendì.
Nus avain pretendì, che purtar mascrina pudessia perfin esser nuschaivel.
Cun la distanza d’intgins mais stoppia el dir, ch’el avess stuì esser pli critic envers talas pretensiuns, ha Berset ditg.
La Svizra profitescha dals megliers vaccins
Percunter ha Alain Berset ludà en l’intervista la campagna da vaccinar svizra. I vegnian duvrads be ils megliers vaccins da mRNA – quai na possian betg blers auters stadis pretender.