Ils delegads e las delegadas da la Partida populara svizra èn sa radunads a Basilea ad in di da partida extraordinari. Quai per lantschar l’iniziativa per la protecziun dals cunfins.
L'iniziaziva da la PPS pretenda tranter auter da controllar sistematicamain persunas che vegnan en Svizra. Sche quai na saja betg cumpatibel cun ina cunvegna internaziunala, stoppia il Cussegl federal negoziar quella danovamain. Sche quai n’haja betg success, stoppia la Svizra visar la cunvegna «sin il proxim termin pussaivel».
Il text da l'iniziativa prevesa ultra da quai che persunas che vegnan en Svizra via in Stadi segir na duaian betg pudair entrar e betg survegnir asil. Era vegn prevesì ch'il Cussegl federal possia fixar in contingent d'asil annual da maximalmain 5'000 persunas.
In grond dispositiv da la polizia ha surveglià l’occurrenza. Ina gruppa da radund 20 persunas haja protestà davant l’entrada dal center da congress cunter la politica da migraziun da la PPS.