Dapi l’emprim da mars 2019 vegnan las proceduras d’asil tractadas a moda accelerada. In’emprima bilantscha saja positiva, di il Secretariat da stadi per la migraziun SEM. Las proceduras d’asil possian vegnir terminadas en media entaifer 50 dis.
Cas da Dublin, tar ils quals in auter stadi è responsabel per la procedura d'asil, cuzzan en media perfin mo 35 dis. Cun proceduras uschè speditivas è il SEM lunsch sut las limitas da la lescha. Tenor quella na dastgan proceduras d'asil betg cuzzar pli ditg che 140 dis. Avant l'introducziun dal sistem nov cuzzavan ellas en media il dubel uschè ditg.
RTR actualitad 12:00